ټپي کابله

پرهر  پرهر  ټپي  ټپي  شوې  په  ګولو  کابله
سوری سوری شوې سور انګار په سرو مرمو کابله
                د شاه زلمو کابله د ننګیالو کابله

 بچیان دې واړه یتیمان پیغلې دې کونډې شولې
په چیغو چیغو دی هر ځوان دی په سلګو کابله
د شاه زلمو کابله د ننګیالو کابله

ټوټې ټوټې دې هر اندام شولو په توره جدا
ستي ستي شوې هرې خوا ته په جنګو کابله
د شاه زلمو کابله د ننګیالو کابله

ای د امو نه تر اټک د هر افغان زړګیه
دې  لر او بر په تا راټول د پښتنو کابله
د شاه زلمو کابله د ننګیالو کابله

چې تل یې پاتې کاملې ته لوی میراث د نیکو
د احمد شاه او د میرویس اې د پلرو کابله
د شاه زلمو کابله د ننګیالو کابله
»»»
کامله زرلښته (طاهر) امستردام